Иҫәнғол ауылының “Аленушка” балалар баҡсаһының мәктәпкәсә әҙерлек “Бал ҡорттары” башҡорт төркөмө тәрбиәнеүселәре (тәрбиәсе Хәсәнова Р.Ғ.) беҙҙең китапханаға “Башҡорт халыҡ әкиәттәре” исемле әҙәби сәғәткә килделәр. Бәләкәстәрҙе китапханасы апайҙар бик йылы ҡаршы алдылар. Сара алдынан балалар китапхана менән таныштылар, кәштәләрҙә ниндәй китаптар урынлашҡанын белделәр, балалар өсөн сығарылған журналдарҙы байҡанылар. Артабан инде кескәйҙәр башҡорт халыҡ әкиәттәре тураһында йыйылған китап күргәҙмәһен ҡарап, әкиәттәр тураһында мәғлүмәт тыңланылар, викторина һорауҙарына яуап бирҙеләр, “Әбйәлил” исемле анимацион видео-китабын ҡаранылар. Артабан балалар ҡараған әкиәт буйынса фекерҙәрен әйттеләр, әҫәрҙең геройына хас сифаттарҙы асыҡланылар. Әкиәттәр аша балаларҙың аң – фекерен үҫтереү, халыҡ ижады менән таныштырыу маҡсатында ойошторолған сара кескәй ҡунаҡтарҙың күңеленә хуш килде. Улар һәр береһе “Аҡбуҙат” журналын бүләккә алып китапханасы апайҙар менән хушлаштылар.