Тап әкиәт — миңә китап,
Һәр бите — серле ишек.
Асам шул ишектәрҙе,
Биттәрҙән биткә күсеп.
(Муса Ғәли)
Иҫәнғол ауылының “Ҡояшҡай” балалар баҡсаһының мәктәпкәсә әҙерлек башҡорт “Бал ҡорттары” төркөмө тәрбиәләнеүселәре балалар китапханаһына килгән яңы китаптар менән танышты. Гүзәл Ситдикова “Балапандар күккә ынтыла”, Рәфис Ҡорбан “Мин байрамдар яратам”, Ринат Хәйри “Һөйөнсө!”, Тимур Рәхмәтуллин “Тылсым эйәләре”, Гөлнур Шәрипова “Дуҫлыҡ көсө”, Гөлсимә Зиннәтуллина “Скрипкачы чикерткә”, Александр Шуравлев “Мапантенок и мир чудес” – был китаптарҙың һәр береһе бәләкәстәр күңеленә хуш килде. Ә инде “Иң тәмле нәмә” исемле башҡорт халыҡ әкиәтен уҡып, уның йөкмәткеһе буйынса әңгәмә үткәреү балалар өсөн бик файҙалы һәм әһәмиәтле булды.
Башҡортостандың Зәйнәб Биишева исемендәге «Китап» нәшриәте баҫып сығарған балалар өсөн был сағыу матур китаптарҙы ата-әсәләр менән килеп китапханала танышырға, йә иһә өйгә алып ғаиләң менән бергә уҡырға була икәнен китапханасы апай кескәйҙәргә еткерҙе. Тик китапхананан алған китаптарҙы бысратмай, йыртмай ваҡытында ҡайтарырға кәрәклеге тураһындағы ҡағиҙәләрҙе ҡабаттан иҫкә төшөрҙөләр.